يمكن حصر انسجه التيشرتات فى السوق المصري فى 4 انواع اساسيه وهي
القطن الصافي 100%
اوعه تصدق انك ممكن تشتريه بسعر رخيص لانه مش موجود وعمره ماهيقل جمله عن 80 او 100 جنيه واضرب اضعاف لو قطاعى
متسالنيش اعرفه ازاي لانك مش هتعرفه غير لو حللته في معمل ???????? وعلي عدد العقد في السنتيمتر بيتحدد جودته وسعره وبيوبر ولا لاء وقصه كبيره اوييييي
مميراته — حلو في الملابس الداخليه علشان العرق وملمسه الناعم
عيوبه — بيكسر ويكش
سامعك???? بتقول في طرق تانيه اعرف بيها
ومتقليش التكت مكتوب عليه علشان مازعلش منك فاهمني طبعا ????
طب شوف الحاجات دي مع انها محتاجه خبره باردو
القطن غير منفذ للضوء
مبيعملش شحنات كهربائيه
لما تفركه بين صوابعك مش هيسخن
القطن المخلوط
ممكن يوصل الخليط لدرجه 70% قطن و 30% حاجات تانيه زي البولي استر وغيرها وسيظل الغالب علي التيشرت الطابع القطني
ازاي تعرفه ؟ ???? 99% من التيشرتات الموجوده في السوق مخلوط
(لوبتغسل التيشرت وتلبسه من غير مكوه وبعدين يتفرد عليك )
مميزاته — رخيص وعملي مبيكسرش جامد ولا بيكش جامد
( تلاقيه ماسك بعد الغسيل ويريح مع اللبس )
عيوبه — العرق و ريحته حساسيه لبعض الاشخاص والرضع
( عرفت لييه ملابس البيبى الاصليه غاليه جدا )
قد ينفذ للضوء جذئيا
بيعمل شحنات كهربائيه
هيسخن شويه عند فركه بين صوابعك لفتره قصيره
البولي استر الصافي
النسيج ده متصنع بالكامل في المعامل والمصانع من مشتقات البترول واسمه كده ليه ؟ هقولك
تُسمّى عَمليّة تكوين البوليستر بالبلمرة ..وكلمة بوليستر مُشتقّة من مُفردتي “poly” التي تعني العديد، و “ester” وهو مركّب كيميائي عضوي أساسي.
المادّة الأساسيّة المُستخدَمة في صنع البوليستر هي الإثيلين، وهي مُشتقّة من البترول، إلى جانب الهواء، والفحم، والماء
ازاي تعرفه ؟ المره دي صدق التكت او البياع اكيد مش هيكذب عليك
وبيتعمل منه التيشرت الرياضى وملابس السباحه والحاجات دى
مميزاته — متين وسهل الصبغ ومبيكشش ولا بيكسر ولا بيريح (يتمدد) فس اللبس
عيوبه –غير مريح في اللبس ولا يمتص العرق
علي فكره في دلوقتي تقنيات حديثه بتستخدمها مصانع الملابس الرياضيه الكبري علشان تمتص العرق بس الملابس دي قابله للاشتعال بسرعه???? فخلي بالك
نسيج مكون من 95% من القطن 5% ليكرا
الليكرا نسيج صناعي زي الاستك مرن وقوي ومقاوم للانكماش بدرجه كبيره
طبعا عرفنا مميرات القطن من راحه وترطيب وامتصاص عرق ولطفه علي البشره الحساسه
نضيف عليه شويه ليكرا صغيرين علشان نظبط عيوب القطن من تكسير وكششان لنحصل علي هذا النسيج الرائع
بيكون مريح جدا في اللبس والتمرينات الرياضيه والحركات المفاجئه وبياخد شكل الجسم يعني ينفع للجنسين unisex
نصيحه بقي
لو جسمك حلو وعاوز تظهره تلبس مقاس اقل بدرجه من المقاس اللي بتلبسه في القطن
انما لو جسمك حلو باردو ومش عايز تظهره ????هتلبس نفس مقاسك الي متعود عليه او اكبر كده كده هتكون مرتاح وكده كده انت حلو ????
خليك علي طبيعتك علشان انت حلو في كل الاحوال BE YOURSELF